Початок | Контакт | Сербски

                Рушаюци од програмних задаткох Дружтва за руски язик, литературу и културу и Плану розвою и дїялносци Дружтва за руски язик, литературу и културу (2011-2020), Управни одбор предложел шлїдуюцу програму Дружтва за 2016. рок:

1. Преучованє и наукови обробок руского язика: у 2010. року закончени Руско-сербски словнїк як вецейрочнa екипнa роботa руских линґвистох. Источашнє ше будзе робиц на проєктох хтори започати 2002. року: Словнїк руского народного язика и Правопис руского язика (Правописни словнїк), на хторих анґажовани виглєдовацки екипи у сотруднїцтве зоз Одсеком за русинистику Филозофского факултета у Новим Садзе и Одбором за линґвистику Дружтва. Тиж ше предлужи з активносцу применьованя I и II тому Сербско-руского словнїка (перши том обявени 1995. а други 1997. року), Ґраматики руского язика др Юлияна Рамача (2002) и Руско-сербского словнїка у шицких сферох образовного, културного, информативного, прекладательного живота Руснацох. Видати и два терминолоґийни словнїки: Словнїк медицинскей терминолоґиї сербско-руско-анґлийски и Словнїк защити рошлїнох и животногo стредку сербско-руско-латинско-анґлийски. З тим у вязи, по потреби орґанизовац инструктивни схадзки и розгварки у школох, медийох: редакцийох радия, ТВ итд.

2. Пестованє и унапредзованє руского язика и литератури и язичней култури дзецох и школярох: треба ше намагац отримац досцигнути уровень облапеносци дзецох и школярох зоз воспитаньом и образованьом на руским язику (на предшколским и основношколским возросту) у Руским Керестуре, Коцуре и Дюрдьове, як и пестовац руски язик як виборни предмет з елементами националней култутри у Новим Садзе, Вербаше, Кули, Новим Орахове/Бачкей Тополї, Суботици, Ґосподїнцох, Савиним Селу, Шидзе, Бачинцох, Беркасове, Бикичу и Сримскей Митровици. Далєй потримовац роботу Ґимназиї и других напрямох штреднєй школи на руским язику у Руским Керестуре, а потримовац и орґанизованє факултативного виучованя руского язика на штреднїм ступню у Новим Садзе, Шидзе и других штредкох (Вербас, Кула), а тиж и у обласци предшколского вихованя у Новим Садзе, Вербаше и других заинтересованих штредкох. У складзе зоз инициятиву 12. стретнуца руских школох у Миклошевцох (2006), потримовац  виучованє руского язика у руских штредкох у Горватскей, а у сотруднїцтве зоз членми Дружтва и у Канади (Киченер и Нотрбатлефорд). Закладац ше за образованє цо векшого числа професорох руского язика на Катедри за руски язик и литературу - Одсеку за русинистику Филозофского факултета у Новим Садзе, як и наставнїкох-професорох класней настави на учительских факултетох, вихователькох на Висшей школи у Новим Садзе итд. Додзельовац награди наставнїком руского язиказоз меном и подобу проф. Гавриїла Г. Надя (додзелєни 8), як и Славки Сабадош, Меланиї Павлович и Ани Кнежевич школяром хтори виучую и пестую руски язик.    
Треба провадзиц пременки у обласци образованя и воспитаня хтори ше реализию у рамикох Министерства просвити и технолоґийного розвою Републики Сербиї и Покраїнского секретарияту за образованє, предписаня, управу  и национални меншини-национални заєднїци, сотрудзовац зоз Педаґоґийним заводом Войводини и Одбором за образованє Националного совиту рускей националней меншини, а у рамикох активох наставнїкох и вихователькох руского язика провадзиц активносци у обласци воспитаня и образованя: приношенє и реализация наставних планох и програмох воспитно-образовней роботи, видаванє учебнїкох и приручнїкох на руским язику, наставу виронауки, образованє и фахове усовершованє наставнїкох и вихователькох, анґажованє школского инспектора-надзорнїка за руски язик, финансованє у тей обласци итд. Будзе ше сотрудзовац зоз Покраїнским секретариятом за културу и явне информованє и Покраїнским секретариятом за науку и технолоґийни розвой Влади АП Войводини, Координацийним одбором дружтвох за язики, литературу и културу, Оддзелєньом за нєвладово орґанизациї Заводу за културу Войводини, Заводом за културу войводянских Руснацох итд. 
У сотруднїцтве зоз инстутуциями просвити, образованя и за права националних заєднїцох, планує ше орґанизованє Двацецпершого стретнуца руских основних и штреднїх школох у хторих ше наставу отримує на руским язику и школох у хторих ше руски язик виучує як виборни, односно факултативни  предмет у Новим Садзе, або ше нащиви Беоґрад..
Уключиц ше до активносцох хтори вязани за медзиокружне и републичне змаганє з руского язика и язичней култури за школярох основних школох (спрам пропозицийох компетентних институцийох образованя) и у сотруднїцтве з Активом наставнїкох руского язика Дружтва. Перше (2000), друге (2001), пияте (2005), осме (2008), єденасте (2011) и штернасте републичне змаганє отримане (2014), а тиж и друге и пияте медзиокружне  у Основней и штреднєй школи зоз домом школярох „Петро Кузмяк" у Руским Керестуре (2002. року змаганя нє було). Треце (2003), шесте (2006), дзевяте (2009), дванасте (2012) и петнасте републичне (2015) и друге и пияте медзиокружне було у Основней школи „Йован Йованович Змай" у Дюрдьове. Штварте (2004), седме (2007), дзешате (2010), тринасте републичне (2013) и перше и штварте медзиокружне отримане у Основней школи „Братство єдинство" у Коцурe) дзе ше 2016. року планує и седме медзиокружене и шеснасте републичне.

3. Збогацованє литературней дїялносци и творчосци на руским язику: треба потримовац литературну дїялносц на мацеринским язику за дзеци и школярох, а тиж и преклади зоз сербского язика и язикох других националносцох. Окремну увагу треба пошвециц активносци литературних секцийох у наших местох ( Микола М. Кочиш у Бачинцох, Анґела Прокоп у Шидзе, Штефан Чакан у Новим Орахове, Ана Кнежевич у Сримскей Митровици), сотрудзовац зоз часописом за дзеци Заградка, участвовац на манифестацийох: на Костельниковейєшенї, Мемориялу Петра Ризнича Дядї у Руским Керестуре, Яри Мафтея Виная у Суботици, Дньох Миколи М.Кочиша у Новим Садзе, Дюрдьове и других местох, Мемориялу проф. Гавриїла Г. Надя, унапредзовац литературни конкурси др Мафтея Виная и Штефана Чакана. У Новим Садзе 2007. року основана литературна манифестация Поетични нїтки Меланиї Павлович, у Бикичу Литературна секция Михала Ковача (2011), уДюрдьовепрекладательна секция „Амалия Хромиш” (2012) и на таки способ указана увага визначним литературним и културним творительом. Означовац рочнїци у обласци образованя, култури и видавательней дїялносци, рочнїци литературних, театралних и подобових творительох, рочнїци руских воспитно-образовних институцийох итд.

  Руски библиотеки, школи, руски населєня:
140 роки читальнї у Руским Керестуре (1876-2016)
80 роки першей рускей друкарнї у Руским Керестуре (1936-2016)
70 роки насельованя Руснацох до Нового Орахова (1946-2016)

 Руски учителє, писателє, публицисти, подобово и културни творителє:  
200 роки од народзеня Петра Кузмяка (1816-1900), учителя
190 роки од народзеня о. Андрия Лабоша, ст. (1826-1918), священїка, руского предняка
150 роки од народзеня Михайла Врабеля (1866-1923), педаґоґа, етноґрафа, публицисти
150 роки од народзеня Михайла Стрибера (1866-1949), учителя
130 роки од народзеня др Гавриїла Костельника (1886-1948), писателя, линґвисти
120 роки од народзеня Митра Надя (1896-1962), писателя, руского предняка
110 роки од народзеня Яши Бакова (1906-1974), професора, спортского роботнїка
90 роки од народзеня Янка Саламона (1926-1998), учителя, руского предняка
90 роки од народзеня Меланиї Маринкович (1926-2014), културного творителя, хуманисти
80 роки од народзеня Дюри Папгаргая (1936-2008), писателя, културного творителя
80 роки од народзеня Мирона Жироша (1936), просвитного и културного творителя, публицисти
70 роки од народзеня Ирини Папуґа (1946), професора педаґоґиї, културного творителя
70 роки од народзеня Владимира Бесерминя (1946-2014), професора, писателя, културного творителя

Руски орґанизациї, редакциї, гласнїки, кнїжки, часописи:
80 роки од виходзеня Руско-україского алманаха бачваньско-сримских писательох у Осєку (1936)
50 роки од виходзеня першого обновеного числа  часопису за културу, уметносц и дружтвени питаня
„Шветлосци” (1966)
40 роки од видаваня Музейней збирки, Руски Керестур (1976)

Орґанизовац промоциї нових кнїжкох, учебнїкох, часописох, зборнїкох и публикацийох. Означовац  рочнїци зоз календара сербского народу и националних меншинох у Войводини. Сотрудзовац зоз Координацийним одбором дружтвох за язики, литературу и културу хтори роби у рамикох Оддзелєня за нєвладово орґанизациї Заводу за културу Войводини у Новим Садзе чий Дружтво длугорочни член на видаваню Мултиязичного билтену МОСТ.  

4. Пестованє културного и духовного скарбу и подобовей уметносци: пошвециц увагу призберованю и чуваню педаґоґийней (школскей), литературней и линґвистичней документациї и орґанизовац пригодни вистави. У рамикох пестованя културного скарбу предложиц проєкт о надгробних памятнїкох, потримовац роботу Клубу подобових уметнїкох и його програми, орґанизовац заєднїцки подобово вистави зоз каталоґом, а порушовац и орґанизованє самостойних виставох, як руских уметнїкох, так и уметнїкох зоз хторима робя и творя у своїх штредкох.
Орґанизовац петнасту школску и дванасту подобову колонию Стретнуце у Боднарова у Ґосподїнцох з участвованьом школярох з наших штредкох, афирмованих подобових уметнїкох, як и тих цо праве пробую твориц у тих обласцох. Иницировац и активносци на пестованю подобовей творчосци Надї Волчко, таписеристки по походзеню зоз Беркасова (у Шидзе), етнолоґийней збирки у Бикичу, етно хижи - скорейшей Рускей просвити у Бачинцох, Етно-клубу у Коцуре и других руских штредкох.  

5. Виглєдовацка робота у обласци руского язика: Дружтво будзе и далєй робиц на проєкту под назву „Розвиванє, очуванє и унапредзованє руского язика дзецох и младежи" (1996-2016) чию задумку и предкладанє дала др Мелания Микеш (1924-2007). У 2016. року активносци треба предлужиц и унапрямиц на розвиванє и унапредзованє руского язика у предшколским, основним и штреднїм образованю под назву „Шицки руски дзеци до руских школох!”, а тиж и у рамикох висшого и високого образованя, за виховательки у руских предшколских установох, наставнїкох-професорох у основних и штреднїх школох (висши школи, факултети, мастер студиї).

Источашнє, у 2016. року спомнути виглєдовацки проєкт у обласци руского язика прешириц и у рамикох V фази предлужиц зоз виглєдованьом хторе вязане за руску дияспору (Канада, Австралия, Нємецка). У сотруднїцтве зоз др Александром Д. Дуличенком пририхтац (конциповац) виглєдованє хторе вязане за функциї руского язика у Войводини (12 функциї: образованє, наука, култура, литература, прекладательство, информованє, видавательство, церква, театер итд.).

6. Видавательна дїялносц Дружтва: Предлужи ше з видаваньом: Зборнїка роботох „StudiaRuthenica”: видац 21 (34) число у хторим буду обявени прилоги зоз науково-фахових сходох 2016. року, а обявя ше и написи о рочнїцох, нових виданьох Дружтва итд. По законченю Словнїка сербско-руско-латинско-анґлийского о защити рошлїнох и животного стредку плановац терминолоґийни словнїк зоз даєдней другей обласци. На планє видаваня публикацийох зедициї Одняте од забуца у пририхтованю и прилоги з обласци музичней творчосци, а потримац и виданя хтори предложа фахово цела Дружтва: секциї итд.

7. Робота секцийох, фахових целох и редакцийох: намагац ше отримац уровень приятих членох (1213, oд того  порядни 1013, почесни 111 и помагаюци 89) у секцийох, а примац и нових у местох дзе робя 15 секциї: Нови Сад, Руски Керестур, Коцур, Дюрдьов, Кула, Вербас, Нове Орахово/Бачка Тополя, Сримска Митровица, Беоґрад, Ґосподїнци, Шид, Бачинци, Бикич,Беркасов, Киченер (Канада), Миклошевци, Петровци, Вуковар (Горватска) и других штредкох: Суботица, Савине Село, Зомбор итд. Потримовац роботу одборох за линґвистику, литературу, за културни и духовни скарб, за науково виглєдованя, як и редакциї зборнїкох, часописох и других виданьох, обезпечуюци материялни средства за  їх обявйованє и друкованє. 

8. Медзинародну активносц треба реализовац у рамикох интересованя фаховцох за руски язик и литературу, а по можлївосци посилац и наших фаховцох на сходи и схадзки до иножемства. Черац часописи и публикациї, обявйовац фахови и наукови сообщеня зоз темами хтори ше одноша на руски язик, литературу и културу (у дияспори), орґанизовац нащиви до образовних, наукових и културних институцийох (музеї, ґалериї, библиотеки) итд. Сотрудзовац зоз подобнима орґанизациями и поєдинцами (почитователями руского язика и литератури) у рамикох рускей дияспори у Канади, Австралиї, на Новим Зеланду итд.

9. Сотруднїцтво з орґанизациями и институциями: Сотрудзовац зоз дружтвами за язики, литературу и културу Координацийного одбору Заводу за културу Войводини, одборами Националного совиту рускей националней меншини за образованє и културу и другима здруженями, орґанизациями, заєднїцами (асоцияциями), матками, школами, библиотеками, ґалериями, министерствами, покраїнскима секретариятами за образованє, науку, културу и за права националних меншинох, општинскима управами за дружтвени дїялносци, културнима центрами, факултетами Универзитета у Новим Садзе, церковнима општинами у местох дзе жию Руснаци, средствами информованя, а прейґ електронских медийох витвориц контакти и зоз Руснацами у швеце (Руснаци у Панониї,РДСА у Канади, Руснаци на интернету).    

10. Робота Скупштини, Управного одбору и роботних целох Дружтва: статутарну дїялносц Дружтва реализовац у рамикох предвидзених материялних можлївосцох и з тим у вязи плановац отримованє 2-3 схадзкох Управного пдбору, рочну схадзку Скупштини, як и вецей схадзки роботних целох. Исти активносци предвидзиц и у секцийох по местох. Отримац стаємну комуникацию зоз членством у нас и у швеце. Основани http://www.druztvo.com сайт на интернету (2008) дополньовац и преширйовац пре информованє о програмних активносцох Дружтва и у 2016. року.

Нови Сад, 2015/2016. року
Управни одбор Дружтва за руски язик, литературу и културу

---

СЕКЦИЙОМ ДРУЖТВА ЗА РУСКИ ЯЗИК, ЛИТЕРАТУРУ И КУЛТУРУ

                    У рамикох планованя активносцох Дружтва за руски язик, литературу и културу у 2016. року у прилогу посиламе шлїдуюци материяли:

1.  Програмa Дружтва за 2016. рок зоз финансийним планом
2.  Календар рочнїцоху 2016. року
3.  Календар мешачних активносцох у 2016. року
4.  Препатрунок активносцох Дружтва у 2015. року
5.  Препатрунок видавательней дїялносци Дружтва
6.  Податки о роботи и розвою Дружтва (по сербски)
7.  Членски картон Дружтва по руски и двоязично

Модлїме же бисце приложени материяли хасновали при планованю активносцох у 2016. року, а тиж и информовали о отримованю схадзкох секциї хтори плануєце у наступним чаше и о програми роботи у вашим месце (штредку).
Надпоминаме же Статут Дружтва обявени у Хронїки Дружтва Studia Ruthenicа 15 (28), 2010, План розвою и дїялносци (2011-2020) у Studia Ruthenici 16 (29), 2011, a Oдлука о членох Скупштини и руководстве Дружтва у Studia Ruthenicа 20 (33), 2015, б. 198-200.

Послате по птт секцийом у наших местох:

1. Руски Керестур: Владимир Дудаш/Мария Дорошки
2. Коцур: Tатяна Мученски/Снежана Шанта
3. Дюрдьов: Мария Самарджич/Гелена Салаґ
4. Нове Орахово/Бачка Тополя: мср. Сенка Бенчик/Татяна Дудаш
5. Ґосподїнци: Владимир Салонски/Любина Пантич
6. Вербас Славица Мали/Нада Лендєр/Славко Сабо
7. Кула: Мелания Арваї/Мария Стрибер
8. Савино Село: Леона Олеар/Рахман Тиґань
9. Суботица: Татяна Таґасович/Наташа Ґрунчич
10. Беоґрад: Олґица Лендєр Радович/о Владислав Варґа
11. Сримска Митровица: Моника Абодї Митрович/Душанка Костич
12. Шид/Беркасов: Владимир Ґовля/Владимир Дїтко/Славко Загорянски
13. Бачинци: Светлана Жанплонг/Златица Сивч Здравич/Влада Задрипко
14. Бикич Дол: мср. Зденко Лазор/Желька Лазор/Деян Бобаль
15. Нови Сад: Гелена Гафич Стойков/Мария Канюх Йозанов

До иножемства по интернету:                         

1. Миклошевци, Горватска: Дюра Лїкар/Ксения Лїкар
2. Петровци/Стари Янковци, Горватска: Наталия Гнатко/мр Илона Грецешин
3. Киченер, Канада: Гавриїл Колєсар/Єлена Колєсар
4. Саскачеван/Норт Батлефорд, Канада: Любомир Медєши/ Весна Фа/Любица Павлович
5. Австралия: Желимир Пап/Славомир Славе Шанта

            З почитованьом

 Секретар Дружтва Ирина Папуґа
 Предсидатель Скупштини  др Юлиян Рамач
Предсидатель Управного одбору Владимир Салонски .