Вишла
Studia Ruthenica
число 12

Змист:

Дипломски роботи студентох Катедри за руски язик и литературу Филозофского факултета у Новим Садзе

Рочнїци, промоциї, здогадованя

Новши виданя – рецензиї и огляднуца

 

Традиция и поезия

Хронїка Дружтва за руски язик, литературу и културу

ПРОГРАМА
ДРУЖТВА ЗА РУСКИ ЯЗИК, ЛИТЕРАТУРУ И КУЛТУРУ
за  2014. рок

            Рушаюци од програмних задаткох Дружтва за руски язик, литературу и културу и Плану розвою и дїялносци Дружтва за руски язик, литературу и културу (2011-2020), Управни одбор предложел шлїдуюцу програму Дружтва за 2014. рок:
1. Преучованє и наукови обробок руского язика: у 2010. року закончени Руско-сербски словнїк як вецейрочнa екипнa роботa руских линґвистох. Источашнє ше будзе робиц на проєктох хтори започати 2002. року: Словнїк руского народного язика и Правопис руского язика (Правописни словнїк), на хторих анґажовани виглєдовацки екипи у сотруднїцтве зоз Одсеком за русинистику Филозофского факултета у Новим Садзе и Одбором за линґвистику Дружтва. Тиж ше предлужи з активносцу применьованя I и II тому Сербско-руского словнїка (перши том обявени 1995. а други 1997. року), Ґраматики руского язика др Юлияна Рамача (2002) и Руско-сербского словнїка у шицких сферох образовного, културного, информативного, прекладательного живота Руснацох. Видати и два терминолоґийни словнїки: Словнїк медицинскей терминолоґиї сербско-руско-анґлийски и Словнїк защити рошлїнох и животногoстредку сербско-руско-латинско-анґлийски. З тим у вязи, по потреби орґанизовац инструктивни схадзки и розгварки у школох, медийох: редакцийох радия, ТВ итд.

2. Пестованє и унапредзованє руского язика и литератури и язичней култури дзецох и школярох: треба ше намагац отримац досцигнути уровень облапеносци дзецох и школярох зоз воспитаньом и образованьом на руским язику (на предшколским и основношколским возросту) у Руским Керестуре, Коцуре и Дюрдьове, як и пестовац руски язик як виборни предмет з елементами националней култутри у Новим Садзе, Вербаше, Кули, Новим Орахове/Бачкей Тополї, Суботици, Ґосподїнцох, Савиним Селу, Шидзе, Бачинцох, Беркасове, Бикичу, Сримскей Митровици и Крущичу. Далєй потримовац роботу Ґимназиї и других напрямох штреднєй школи на руским язику у Руским Керестуре, а порушовац и орґанизованє пестованя руского язика як факултативного предмета на штреднїм ступню у Новим Садзе, Шидзе, а тиж и у обласци предшколского вихованя у Новим Садзе, Вербаше, Суботици, Шидзе и других заинтересованих штредкох. У складзе зоз инициятиву 12. стретнуца руских школох у Миклошевцох (2006), потримовац  виучованє руского язика у руских штредкох у Горватскей, а у сотруднїцтве зоз членми Дружтва и у Канади (Киченер и Нотрбатлефорд). Закладац ше за образованє цо векшого числа професорох руского язика на Катедри за руски язик и литературу - Одсеку за русинистику Филозофского факултета у Новим Садзе, як и наставнїкох-професорох класней настави на учительских факултетох, вихователькох на Висшей школи у Новим Садзе итд. Додзельовац награди наставнїком руского язиказоз меном и подобу проф. Гавриїла Г. Надя (додзелєни 7), як и Славки Сабадош, Меланиї Павлович и Ани Кнежевич школяром хтори виучую и пестую руски язик.    
Треба провадзиц пременки у обласци образованя и воспитаня хтори ше реализию у рамикох Министерства просвити и технолоґийного розвою Републики Сербиї и Покраїнского секретарияту за образованє, управу и национални заєднїци, сотрудзовац зоз Педаґоґийним заводом Войводини и Одбором за образованє Националного совиту рускей националней меншини, а у рамикох активох наставнїкох и вихователькох руского язика провадзиц активносци у обласци воспитаня и образованя: приношенє и реализация наставних планох и програмох воспитно-образовней роботи, видаванє учебнїкох и приручнїкох на руским язику, наставу виронауки, образованє и фахове усовершованє наставнїкох и вихователькох, анґажованє школского инспектора-надзорнїка за руски язик, финансованє у тей обласци итд. Будзе ше сотрудзовац зоз Покраїнским секретариятом за културу и явне информованє и Покраїнским секретариятом за науку и технолоґийни розвой Влади АП Войводини, Координацийним одбором дружтвох за язики, литературу и културу, Оддзелєньом за нєвладово орґанизациї Завода за културу Войводини, Заводом за културу войводянских Руснацох итд.   
У сотруднїцтве зоз инстутуциями просвити, образованя и за права националних заєднїцох, планує ше орґанизованє Двацетого стретнуца руских основних и штреднїх школох у хторих ше наставу  отримує на руским язику и школох у хторих ше руски язик виучує як виборни, односно факултативни  предмет у Бачинцох (Општина Шид).
Уключиц ше до активносцох хтори вязани за медзиокружне и републичне змаганє з руского язика и язичней култури за школярох основних школох (спрам пропозицийох компетентних институцийох образованя) и у сотруднїцтве з Активом наставнїкох руского язика Дружтва. Перше (2000), друге (2001), пияте (2005), осме (2008), єденасте републичне змаганє и друге медзиокружне (2011) отримане у Основней школи и ґимназиї „Петро Кузмяк" у Руским Керестуре (2002. року змаганя нє було), треце (2003), шесте (2006), дзевяте (2009) и дванасте републичне и друге медзиокружне (2012) було у Основней школи „Йован Йованович Змай" у Дюрдьове, штварте (2004), седме (2007), дзешате ювилейне (2010) и тринасте (2013) републичне и перше (2010) и штварте (2013) медзиокружне отримане у Основней школи „Братство єдинство" у Коцурe. Пияте медзиокружене и штернасте републичне ше планує 2014. року у ОШ „Петро Кузмяк" у Руским Керестуре.                                            
3. Збогацованє литературней дїялносци и творчосци на руским язику: треба потримовац литературну дїялносц на мацеринским язику за дзеци и школярох, а тиж и преклади зоз сербского язика и язикох других националносцох. Окремну увагу треба пошвециц активносци литературних секцийох у наших местох (уж длугши час роби секция: Микола М. Кочиш у Бачинцох, Анґела Прокоп у Шидзе, Штефан Чакан у Новим Орахове, Ана Кнежевич у Сримскей Митровици), сотрудзовац зоз часописом за дзеци Заградка, участвовац на манифестацийох: на Костельниковейєшенї, Мемориялу Петра Ризнича Дядї у Руским Керестуре, Яри Мафтея Виная у Суботици, Дньох Миколи М. Кочиша у Новим Садзе, Дюрдьове, Мемориялу проф. Гавриїла Г. Надя, унапредзовац литературни конкурси др Мафтея Виная и Штефана Чакана. Основана манифестация Поетични нїтки Меланиї Павлович у Новим Садзе (2007), у Бикичу Литературна секция Михала Ковача (2011), а уДюрдьовеПрекладательна секция „Амалия Хромиш” (2012) и на таки способ указана увага визначним литературним и културним творительом. Означовац рочнїци у обласци образованя, култури и видавательней дїялносци, рочнїци литературних, театралних и подобових творительох, рочнїци руских воспитно-образовних институцийох итд.

         Руски места – насельованє Руснацох
180 роки насельованя Руснацох до Бачинцох (1834, 1841)
180 роки насельованя Руснацох до Петровцох (1834)
Руски преднyки, учителє, писателє, публицисти …
140 роки o. Mихаила Мудрого (1874-1936), священїка, першого пред. РНПД 1919. року
140 роки о. др Дионизия Нярадия (1874-1940), владики Крижевского, културного дїяча
110 роки o. Maксимилияна Буили (1904-1994), священїка, писателя (Нови Сад)
110 роки Янка Фейси (1904-1983), учителя, писателя (Коцур)
100 роки Якима Олеяра (1914-1998), учителя, писателя (Нови Сад, Дюрдьов)
100 роки Йовґена Планчака (1914-1977), учителя, културного роботнїка (Н. Сад, Р. Керестур) 
90 роки др Меланиї Микеш (1924-2007), проф. линґвистики, иноватора у науки о язику
80 роки Наталиї Наташи (Чижмар) Голуб (1934-1994), виховательки (Дюрдьов)
80 роки Надї Волчко (1934-1983), таписеристки, подобовей уметнїци (Беркасов, Шид)
70 роки Амалиї (Балоґ) Ґерлах (1944-1992), писательки (Дюрдьов)
70 роки Ирини Гарди Ковачевич (1944), писательки (Нови Сад, Руски Керестур)
70 роки Нади (Колєсар) Адамович (1944), наставнїци музики (Сримска Митровица, Бачинци)
Руски кнїжки, новини, часописи, aнтолоґиї, стретнуца руских школох …
110 роки Идилского венца „З мoйoго вaлала” др Гавриїла Костельника, Жовква (1904)
90 роки „Єфтайовей дзивки” - першей рускей драми др Гавриїла Костельника РНПД  (1924)
90 роки „Руских новинох” РНПД, Руски Керестур (1924)
80 роки новинох „Заря” КПСЮР, Вербас (1934)
50 роки Антолоґиї дзецинскей поезиї, Руски Керестур, Нови Сад (1964)
50 роки „Литературного слова” НВУ „Руске слово”, Руски Керестур, Нови Сад (1964)
40 роки „Ґраматики руского язика” Mиколи M. Кочиша (1974)
20 роки Стретнуца руских школох: Бачинци (1994, 2004, 2014), Руски Керестур (1995, 1996
и 2003), Шид (1997), Бачка Тополя и Нове Орахово (1998, 2009), Коцур (2000), Дюрдьов
(2001), Кула (2002), Руски Керестур (2003), Ґосподїнци,  (2005), Миклошевци (2006),
Нови Сад (2007), Вербас (2008), Сримска Митровица (2010), Суботица (2011),
Савино Село (2012), Крущич (2013).         

               Орґанизовац промоциї нових кнїжкох, учебнїкох, часописох, зборнїкох и публикацийох. Означовац  рочнїци зоз календара сербского народу и националних меншинох у Войводини. Сотрудзовац зоз Координацийним одбором дружтвох за язики, литературу и културу хтори роби у рамикох Оддзелєня за нєвладово орґанизациї Заводу за културу Войводини у Новим Садзе чий Дружтво длугорочни член на видаваню Мултиязичного билтену МОСТ.  

4. Пестованє културного и духовного скарбу и подобовей уметносци: пошвециц увагу призберованю и чуваню педаґоґийней (школскей), литературней и линґвистичней документациї и орґанизовац пригодни вистави. У рамикох пестованя културного скарбу предложиц проєкт о надгробних памятнїкох, потримовац роботу Клубу подобових уметнїкох и його програми, орґанизовац заєднїцки подобово вистави зоз каталоґом, а порушовац и орґанизованє самостойних виставох, як руских уметнїкох, так и уметнїкох зоз хторима робя и творя у своїх штредкох.
Орґанизовац тринасту школску и дзешату подобову колонию Стретнуце у Боднарова у Ґосподїнцох з участвованьом школярох з наших штредкох, афирмованих подобових уметнїкох, як и тих цо праве пробую твориц у тих обласцох. Иницировац и активносци на пестованю подобовей творчосци Надї Волчко, таписеристки по походзеню зоз Беркасова (у Шидзе), етнолоґийней збирки у Бикичу, етно хижи - скорейшей Рускей просвити у Бачинцох, Етно-клуба у Коцуре и других руских штредкох.    

5. Виглєдовацка робота у обласци руского язика: Дружтво будзе и далєй робиц на проєкту под назву „Розвиванє, очуванє и унапредзованє руского язика дзецох и младежи" (1996-2016) чию задумку и предкладанє дала др Мелания Микеш (1924-2007). У 2014. року активносци треба предлужиц и унапрямиц на розвиванє и унапредзованє руского язика у предшколским, основним и штреднїм образованю под назву „Шицки руски дзеци до руских школох!”, а тиж и у рамикох висшого и високого образованя, за виховательки у руских предшколских установох, наставнїкох-професорох у основних и штреднїх школох (висши школи, факултети, мастер студиї).
Источашнє, у 2014. року спомнути виглєдовацки проєкт у обласци руского язика прешириц и у рамикох V фази предлужиц зоз виглєдованьом хторе вязане за руску дияспору (Канада, Австралия, Нємецка). У сотруднїцтве зоз др Александром Д. Дуличенком пририхтац (конциповац) виглєдованє хторе вязане за функциї руского язика у Войводини (12 функциї: образованє, наука, култура, литература, прекладательство, информованє, видавательство, церква, театер итд.).

6. Видавательна дїялносц Дружтва: Предлужи ше з видаваньом: Зборнїка роботох „StudiaRuthenica”: видац 18 (31) число у хторим буду обявени прилоги зоз сходох 2013. року, а будзе предлужене обявйованє дипломских роботох студентох и мастерских роботох Катедри за руски язик и литературу Филозофского факултету у Новим Садзе (обласц руска ґраматика,  ономастика, литература), а обявя ше и написи о рочнїцох, нових виданьох Дружтва итд. По законченю Словнїка сербско-руско-латинско-анґлийского о защити рошлїнох и животного стредку плановац терминолоґийни словнїк зоз даєдней другей обласци.
На планє видаваня публикацийох зедициї Одняте од забуца у пририхтованю и прилоги з обласци музичней творчосци, а потримац и виданя хтори предложа фахово цела Дружтва: секциї итд.

7. Робота секцийох, фахових целох и редакцийох: намагац ше отримац уровень приятих членох (1189  - порядни 1002, почесни 108 и помагаюци 79) у секцийох, а примац и нових у местох дзе робя 14 секциї: Нови Сад, Руски Керестур, Коцур, Дюрдьов, Кула, Вербас, Нове Орахово/Бачка Тополя, Сримска Митровица, Беоґрад, Ґосподїнци, Шид, Бачинци, Бикич,Беркасов, Киченер (Канада), Миклошевци, Петровци, Вуковар (Горватска) и других штредкох: Суботица, Савине Село, Крущич, Зомбор итд. Потримовац роботу одборох за линґвистику, литературу, за културни и духовни скарб, за науково виглєдованя, як и редакциї зборнїкох, часописох и других виданьох, обезпечуюци материялни средства за їх обявйованє и друкованє. 

8. Медзинародну активносц треба реализовац у рамикох интересованя фаховцох за руски язик и литературу, а по можлївосци посилац и наших фаховцох на сходи и схадзки до иножемства. Черац часописи и публикациї, обявйовац фахови и наукови сообщеня зоз темами хтори ше одноша на руски язик, литературу и културу (у дияспори), орґанизовац нащиви до образовних, наукових и културних институцийох (музеї, ґалериї, библиотеки) итд. Сотрудзовац зоз подобнима орґанизациями и поєдинцами (почитователями руского язика и литератури) у рамикох рускей дияспори у Канади, Австралиї, на Новим Зеланду итд.

9. Сотруднїцтво з орґанизациями и институциями: Сотрудзовац зоз дружтвами за язики, литературу и културу Координацийного одбора Завода за културу Войводини, одборами Националного совиту рускей националней меншини за образованє и културу и другима здруженями, орґанизациями, заєднїцами (асоцияциями), матками, школами, библиотеками, ґалериями, министерствами, покраїнскима секретариятами за образованє, науку, културу и за права националних меншинох, општинскима управами за дружтвени дїялносци, културнима центрами, факултетами Универзитета у Новим Садзе, церковнима општинами у местох дзе жию Руснаци, средствами информованя, а прейґ електронских медийох витвориц контакти и зоз Руснацами у швеце (Руснаци у Панониї,РДСА у Канади, Руснаци на интернету).    

10. Робота Скупштини, Управного одбору и роботних целох Дружтва: статутарну дїялносц Дружтва реализовац у рамикох предвидзених материялних можлївосцох и з тим у вязи плановац отримованє 2-3 схадзкох Управного пдбору, рочну схадзку Скупштини, як и вецей схадзки роботних целох. Исти активносци предвидзиц и у секцийох по местох. Отримац стаємну комуникацию зоз членством у нас и у швеце. Основани http://www.druztvo.org сайт на интернету (2008) дополньовац и преширйовац пре информованє о програмних активносцох Дружтва и у 2014. року.

 Управни одбор
Дружтва за руски язик, литературу и културу

 

Free Dreamweaver Template from JustDreamweaver.com