ПРОГРАМА
ДРУЖТВА ЗА РУСКИ ЯЗИК,
ЛИТЕРАТУРУ И КУЛТУРУ
за 2013. рок

Рушаюци од програмних задаткох Дружтва за руски язик, литературу и културу и Плану розвою и дїялносци Дружтва за руски язик, литературу и културу (2011-2020), Управни одбор предложел шлїдуюцу програму Дружтва за 2013. рок:

1. Преучованє и наукови обробок руского язика: у 2010. року закончени Руско-сербски словнїк як вецейрочнa екипнa роботa руских линґвистох. Источашнє ше будзе робиц на проєктох хтори започати 2002. року: Словнїк руского народного язика и Правопис руского язика (Правописни словнїк), на хторих анґажовани виглєдовацки екипи у сотруднїцтве зоз Одсеком за русинистику Филозофского факултета у Новим Садзе и Одбором за линґвистику Дружтва. Тиж ше предлужи з активносцу применьованя I и II тому Сербско-руского словнїка (перши том обявени 1995. а други 1997. року), Ґраматики руского язика др Юлияна Рамача (2002) и Руско-сербского словнїка (2010)у шицких сферох образовного, културного, информативного, прекладательного живота Руснацох. Видати и два терминолоґийни словнїки: Словнїк медицинскей терминолоґиї сербско-руско-анґлийски и Словнїк защити рошлїнох и животногoстредку сербско-руско-латинско-анґлийски. З тим у вязи, по потреби орґанизовац инструктивни схадзки и розгварки у школох, медийох: редакцийох радия, ТВ итд.

2. Пестованє и унапредзованє руского язика, литератури и язичней култури дзецох и школярох: треба ше намагац отримац досцигнути уровень облапеносци дзецох и школярох зоз воспитаньом и образованьом на руским язику (на предшколским и основношколским возросту) у Руским Керестуре, Коцуре и Дюрдьове, як и пестовац руски язик як виборни предмет з елементами националней култутри у Новим Садзе, Вербаше, Кули, Новим Орахове/Бачкей Тополї, Суботици, Ґосподїнцох, Савиним Селу, Шидзе, Бачинцох, Беркасове, Бикичу, Сримскей Митровици и Крущичу. Далєй потримовац роботу Ґимназиї и других напрямох штреднєй школи на руским язику у Руским Керестуре, а порушовац и орґанизованє пестованя руского язика як факултативного предмета на штреднїм ступню у Новим Садзе, Шидзе, Вербаше, а тиж и у обласци предшколского вихованя у Новим Садзе, Вербаше, Кули, Суботици, Шидзе и других заинтересованих штредкох. У складзе зоз инициятиву 12. стретнуца руских школох у Миклошевцох (2006), потримовац  виучованє руского язика у руских штредкох у Горватскей, а у сотруднїцтве зоз членми Дружтва и у Канади (Киченер и Нотрбатлефорд). Закладац ше за образованє цо векшого числа професорох руского язика на Катедри за руски язик и литературу - Одсеку за русинистику Филозофского факултета у Новим Садзе, як и наставнїкох-професорох класней настави на учительских факултетох, вихователькох на Висшей школи у Новим Садзе итд. Додзельовац награди: проф. Гавриїл Г. Над, наставнїком руского язика (додзелєни 7), Славка Сабадош и Ана Кнежевич школяром хтори виучую и пестую руски язик.    
Треба провадзиц пременки у обласци образованя и воспитаня хтори ше реализию у рамикох Министерства просвити Републики Сербиї и Покраїнского секретарияту за образованє, управу и национални заєднїци, сотрудзовац зоз Педаґоґийним заводом Войводини и Одбором за образованє Националного совиту рускей националней меншини, а у рамикох активох наставнїкох и вихователькох руского язика провадзиц активносци у обласци воспитаня и образованя: приношенє и реализация наставних планох и програмох воспитно-образовней роботи, видаванє учебнїкох и приручнїкох на руским язику, настава виронауки, образованє и фахове усовершованє наставнїкох и вихователькох, анґажованє школского инспектора-надзорнїка за руски язик, финансованє у тей обласци итд. Будзе ше сотрудзовац зоз Покраїнским секретариятом за културу и явне информованє и Покраїнским секретариятом за науку и технолоґийни розвой Влади АП Войводини, Координацийним одбором дружтвох за язики, литературу и културу, Оддзелєньом за нєвладово орґанизациї Завода за културу Войводини, Заводом за културу войводянских Руснацох итд.   
У сотруднїцтве зоз инстутуциями просвити, образованя и за права националних заєднїцох, планує ше орґанизованє Дзеветнастих стретнуцох руских основних и штреднїх школох у хторих ше наставу отримує на руским язику и школох у хторих ше руски язик виучує як виборни, односно факултативни  предмет у Крущичу (Општина Кула).
Треба ше уключиц до активносцох хтори вязани за Медзиокружне и Републичне змаганє з руского язика и язичней култури за школярох основних школох (спрам пропозицийох компетентних институцийох образованя) и у сотруднїцтве з Активом наставнїкох руского язика Дружтва. Перше (2000), друге (2001), пияте (2005), осме (2008), єденасте републичне змаганє и друге медзиокружне (2011) отримане у Основней школи и ґимназиї „Петро Кузмяк" у Руским Керестуре (2002. року змаганя нє було), треце (2003), шесте (2006), дзевяте (2009) и дванасте републичне и друге медзиокружне (2012) було у Основней школи „Йован Йованович Змай" у Дюрдьове, штварте (2004), седме (2007), дзешате ювилейне републичне и перше медзиокружне отримане (2010) у Основней школи „Братство єдинство" у Коцурe.дзе ше планує и штварте медзиокружне и тринасте републичне (2013).                                               
3. Збогацованє литературней дїялносци и творчосци на руским язику: треба потримовац литературну дїялносц на мацеринским язику за дзеци и школярох, а тиж и преклади зоз сербского язика и язикох других националносцох. Окремну увагу треба пошвециц активносци литературних секцийох у наших местох (уж длугши час роби секция: Микола М. Кочиш у Бачинцох, Анґела Прокоп у Шидзе, Штефан Чакан у Новим Орахове, Ана Кнежевич у Сримскей Митровици), сотрудзовац зоз часописом за дзеци Заградка, участвовац на манифестацийох Костельникова єшень, Мемориялу Петра Ризнича Дядї у Руским Керестуре, Яри Мафтея Виная у Суботици, Дньох Миколи М. Кочиша у Новим Садзе, Дюрдьове, Мемориялу проф. Гавриїла Г. Надя, унапредзовац литературни конкурси др Мафтея Виная и Штефана Чакана. Основана манифестация Поетични нїтки Меланиї Павлович у Новим Садзе (2007), у Бикичу Литературна секция Михала Ковача (2011), а уДюрдьовеПрекладательна секция „Амалия Хромишт” (2012) и на таки способ указана увагу визначним литературним и културним творительом. Означовац рочнїци у обласци образованя, култури и видавательней дїялносци, рочнїци литературних, театралних и подобових творительох, рочнїци руских воспитно-образовних институцийох итд.

Руски места, школи, школски будинки, насельованє Руснацох
260 роки рускей школи у Руским Керестуре (1753)
250 роки насельованя Руснацох до Коцура (1763)
210 роки од насельованя Руснацох до Шиду (1803)
210 роки Марийопочанскей школи (1803)
100 роки од вибудови „Замку“ (Новей школи) у Руским Керестуре (1913)
35 роки од вибудови нанйовшого будинку школи у Руским Керестуре (1977)

Руски предняки, учителє, писателє, професоре, публицисту ..
210 роки Александра Духновича (1803-1865), народного будителя
170 роки Михаила Джунї (1843-1894), учителя и дзияка (Руски Керестур)
110 роки Oсифа Костелника (1903-1936), писателя (Петровци)
100 роки Гавриїла Г. Надя (1913-1983), професора, писателя, линґвисти (Коцур)
100 роки Иринея Тимка (1913-1987), дириґента, музичного сотриднїка (Нови Сад)
100 роки Eвґена Сабола (1913-1985), професора, културного творителя (Шид)
90 роки Йовґена Медєша (1923-2008), учитель, режисер, спортиста (Руски Керестур)
90 роки Maриї (Копчански) Ракич (1923-2009), учительки (Дюрдьов, Бачинци)
80 роки Дюри Латяка (1933), писателя, публицисти, културного творителя (Нови Сад)
80 роки Владимира Дудаша (1933), театралного и културного творителя (Руски Керестур)
80 роки  Мирона Романа (1933) просвитного и културного роботнїка (Нови Сад)
80 роки Maриї (Рамач) Чакан (1933), наставнїка, просвитного совитнїка (Нови Сад)
70 роки др Евґениї (Горняк) Барич (1943-1999), професора, линґвисти (Шид, Винковци, Загреб)
70 роки Mирона Канюха (1943), писателя, театралного творителя (ДюрдьовНови Сад)

Руска ґраматика, антолоґиї, кнїжки, театер, руски орґанизациї…
100 роки першей театралней представи у Коцуре (1913), Koцур
90 роки Ґраматики бачванско-рускей бешеди др Гавриїла Костельника, Сримски Карловци (1923)               
80 роки од снованя Kултурно-посвитного союзу югославянских Русинох у Вербаше (1933)
50 роки од видаваня Aнтолоґиї поезиї бачванско-сримских руских писательох (1963)
50 роки „Kрочайох” Mиколи M. Кочиша – першей кнїжки уметнїцкей прози за дзеци (1963)

               Орґанизовац промоциї нових кнїжкох, учебнїкох, часописох, зборнїкох и публикацийох. Означиц  рочнїци зоз календара сербского народу и националних меншинох у Войводини. Сотрудзовац зоз Координацийним одбором дружтвох за язики, литературу и културу хтори роби у рамикох Оддзелєня за нєвладово орґанизациї Заводу за културу Войводини у Новим Садзе чий Дружтво член од 1974. року, як и на видаваню Мултиязичного билтену МОСТ.  

4. Пестованє културного и духовного скарбу и подобовей уметносци: пошвециц увагу призберованю и чуваню педаґоґийней (школскей), литературней и линґвистичней документациї и орґанизовац пригодни вистави. У рамикох пестованя културного скарбу преложиц проєкт о надгробних памятнїкох, потримовац роботу Клубу подобових уметнїкох и його програми, орґанизовац заєднїцки подобово вистави зоз каталоґом, а порушовац и орґанизованє самостойних виставох, як руских уметнїкох, так и уметнїкох зоз хторима робя и творя у своїх штредкох.
Орґанизовац дванасту школску и дзевяту подобову колонию Стретнуце у Боднарова у Ґосподїнцох з участвованьом школярох з наших штредкох, афирмованих подобових уметнїкох, як и тих цо праве пробую твориц у тих обласцох. Иницировац и активносци на пестованю подобовей творчосци Надї Волчко, таписеристкинї по походзеню зоз Беркасова (у Шидзе), етнолоґийней збирки у Бикичу, етно хижи - скорейшей Рускей просвити у Бачинцох, Етно-клубе у Коцуре и других руских штредкох.    

5. Виглєдовацка робота у обласци руского язика: Дружтво будзе и далєй робиц на проєкту под назву „Розвиванє, очуванє и унапредзованє руского язика дзецох и младежи" (1996-2016) чию задумку и предкладанє дала др Мелания Микеш (1924-2007). У 2013. року активносци треба предлужиц и унапрямиц на розвиванє и унапредзованє руского язика у предшколским, основним и штреднїм образованю под назву „Шицки руски дзеци до руских школох!”, а тиж и у рамикох висшого и високого образованя, за виховательки у руских пред. установох, наставнїкох-професорох у основних и штреднїх школох (висши школи, факултети, мастер студиї).
Источашнє, у 2013. року спомнути виглєдовацки проєкт у обласци руского язика прешириц и у рамикох V фази предлужиц зоз виглєдованом хторе вязане за руску дияспору (Канада, Австралия, Нємецка). У сотруднїцтве зоз др Александром Д. Дуличенком пририхтац (конциповац) виглєдованє хторе вязане за функциї руского язика у Войводини (12 функциї: образованє, наука, култура, литература, прекладательство, информованє, видавательство, церква, театер итд.).

6. Видавательна дїялносц Дружтва: Предлужи ше з виходзеньом: Зборнїка роботох „StudiaRuthenica”: видац 17 (29) число у хторим буду обявени прилоги зоз сходу о предшколским воспитаню и образованю у 2012. року, а будзе предлужене обявйованє дипломских роботох студентох и мастерских роботох Катедри за руски язик и литературу Филозофского факултету у Новим Садзе (обласц руска ґраматика,  ономастика, литература), а обявя ше и написи о рочнїцох, нових виданьох Дружтва итд. По законченю Словнїка сербско-руско-латинско-анґлийского о защити рошлїнох и животного стредку плановац терминолоґийни словнїк зоз даєдней другей обласци.
На планє видаванє публикацийох зедициї Одняте од забуца у пририхтованю и прилоги о Просвити у Бачинцох (1932-2012) и з обласци музичней творчосци, а потримац и виданя хтори предложа фахово цела Дружтва: секциї, активи итд..

7. Робота секцийох, фахових целох и редакцийох: намагац ше отримац уровень приятих членох (1178 - порядни 995, почесни 108 и помагаюци 75) у секцийох, а примац и нових у местох дзе робя 15 секциї: Нови Сад, Руски Керестур, Коцур, Дюрдьов, Кула, Вербас, Нове Орахово/Бачка Тополя, Сримска Митровица, Беоґрад, Ґосподїнци, Шид/Беркасов, Бачинци, Бикич,Киченер и Норт Батлефорд (Канада), Миклошевци, Петровци и Вуковар (Горватска) и других штредкох: Суботица, Савине Село, Крущич, Зомбор итд. Потримовац роботу одборох за линґвистику, литературу, за културни и духовни скарб, за науково виглєдованя, як и редакциї зборнїкох, часописох и других виданьох, обезпечуюци материялни средства за їх обявйованє и друкованє. 

8. Медзинародну активносц треба реализовац у рамикох интересованя фаховцох за руски язик и литературу, а по можлївосци посилац и наших фаховцох на сходи и схадзки до иножемства. Черац часописи и публикациї, обявйовац фахови и наукови сообщеня зоз темами хтори ше одноша на руски язик, литературу и културу (у дияспори), орґанизовац нащиви до образовних, наукових и културних институцийох (музеї, ґалериї, библиотеки) итд. Сотрудзовац зоз подобнима орґанизациями и поєдинцами (почитователями руского язика и литератури) у рамикох рускей дияспори у Канади, Австралиї, на Новим Зеланду итд.

9. Сотруднїцтво з орґанизациями и институциями: Сотрудзовац зоз дружтвами за язики, литературу и културу Координацийного одбору Заводу за културу Войводини, одборами Националного совиту рускей националней меншини за образованє и културу и другима здруженями, орґанизациями, заєднїцами (асоцияциями), матками, школами, библиотеками, ґалериями, министерствами, покраїнскима секретариятами за образованє, науку, културу и за права националних меншинох, општинскима управами за дружтвени дїялносци, културнима центрами, факултетами Универзитета у Новим Садзе, церковнима општинами у местох дзе жию Руснаци, средствами информованя, а прейґ електронских медийох витвориц контакти и зоз Руснацами у швеце (Руснаци у Панониї,РДСА у Канади, Руснаци на интернету).    

10. Робота Скупштини, Управного одбору и роботних целох Дружтва: статутарну дїялносц Дружтва реализовац у рамикох предвидзених материялних можлївосцох и з тим у вязи плановац отримованє 2-3 схадзкох Управного пдбору, рочну схадзку Скупштини, як и вецей схадзки роботних целох. Исти активносци предвидзиц и у секцийох по местох. Отримац стаємну комуникацию зоз членством у нас и у швеце. Основани http://www.druztvo.org сайт на интернету (2008) дополньовац и преширйовац пре информованє о програмних активносцох Дружтва и у 2013. року.

Управни одбор
Дружтва за руски язик, литературу и културу

 

Free Dreamweaver Template from JustDreamweaver.com